काठमाडौं । भारत पाकिस्तानबीच सुरु भएको युद्ध तत्कालको लागि रोकिएको छ । भारत र पाकिस्तानबीच युद्ध विराम (सीजफायर) को लागि शनिबार सहमति भएको हो । भारतीय विदेश सचिब विक्रम मिश्रीले शनिबार यो बिषयको पुष्टि गरेका छन् ।

उनले भने, ;पाकिस्तानको सैन्य सञ्चालन महानिर्देशक(डीजीएमओ) ले आज दिउँसो भारतीय जीडीएमओलाई फोनमार्फत सिजफायरको लागि सहमति भएको छ । यो सहमतिअनुसार दुवै पक्षबाट आज साँझ भारतीय समय अनुसार १७ः०० बजेदेखि जमीन, हावा र समुद्रमार्फत हुने सबै प्रकारको सैन्य कारवाही बन्द गरिएको छ । यो बिषयलाई दुबै मुलुकले पालना गर्नुपर्नेछ ।’

यो बिषयमा आगमी मई १२ तारिख अपराह्न १२ बजे फेरी वार्ता हुनेछ । अमेरिकाको मध्यस्थतामा भारत र पाकिस्तान तत्कालको लागि युद्ध विराम गर्न सहमत भएको यसअघि अमेरिकी राष्ट्रपति डोनाल्ड ट्रम्पले दावी गरेका थिए । ट्रम्पले ट्रुथमा आफ्नो स्टाटस राख्दै भनेका थिए, ‘मलाई धेरै खुसी लागेको छ, भारत र पाकिस्तान तत्कालका लागि युद्ध बिराम गरेका छन् ।’

अमेरिकी विदेश मन्त्री मार्को रुवियो र भारतको विदेश मन्त्री एस जनशंकर, पाकिस्तानको विदेश मन्त्री इशाक डार र सेना प्रमुख जनरल असीम मुनीरबीच युद्ध विरामको बिषयमा आजै विभिन्न चरणमा छलफल भएको थियो । पाकिस्तानका विदेश मन्त्री इशाक डारले पनि भारतसँग भएको सहमति आंशिक नभई पूर्ण युद्धविराम सम्झौता भएको स्थानीय जियो टिभीसँग बताएका छन् ।

यसीबीच पाकिस्तानको विमानस्थल प्राधिकरणले सम्पूर्ण उडानका लागि देशको आकाशमार्ग पूर्ण रूपमा पुनः खोलिएको जनाएको छ। यो घोषणा पाकिस्तान र भारतबीच केही दिनसम्म भएको भीषण भिडन्तपछि युद्धविराम सम्झौता भएको केही समयमै सार्वजनिक गरिएको हो।